ఆ కార్ల తయారీ నిలిపివేసిన మారుతి సుజుకి!

జపాన్‌కు చెందిన ప్రముఖ ఆటోమొబైల్ తయారీ సంస్థ సుజుకి మోటార్, తమ పాప్యులర్ మోడల్ అయిన స్విఫ్ట్ కారు ఉత్పత్తిని తాత్కాలికంగా నిలిపివేసింది. చైనా ప్రభుత్వం రేర్ ఎర్త్ (అరుదైన మృత్తికలు) పదార్థాల ఎగుమతులపై ఆంక్షలు విధించడమే ఇందుకు ప్రధాన కారణంగా తెలుస్తోంది. ఈ ఆంక్షల వల్ల అవసరమైన విడిభాగాలు లభించకపోవడంతో సుజుకి ఈ నిర్ణయం తీసుకున్నట్లు సమాచారం.

చైనా రేర్ ఎర్త్స్ ఎగుమతులపై విధించిన ఆంక్షల వల్ల ప్రభావితమైన తొలి జపనీస్ ఆటోమొబైల్ కంపెనీ సుజుకి కావడం గమనార్హం. స్విఫ్ట్ సబ్‌కాంపాక్ట్ మోడల్ (స్విఫ్ట్ స్పోర్ట్ మినహా) ఉత్పత్తిని మే 26 నుంచి జూన్ 6 వరకు నిలిపివేస్తున్నట్లు కంపెనీ గతంలోనే ప్రకటించింది. విడిభాగాల కొరత కారణంగా ఈ నిర్ణయం తీసుకున్నట్లు అప్పట్లో పేర్కొన్నప్పటికీ, ఆ కొరతకు దారితీసిన కారణాలను సుజుకి అధికారికంగా వెల్లడించలేదు. ఈ ఉత్పత్తి నిలిపివేతకు సంబంధించిన కారణాలపై వ్యాఖ్యానించడానికి కంపెనీ ప్రతినిధి నిరాకరించినట్లు తెలిసింది. ఈ వార్తను తొలుత నిక్కీ బిజినెస్ డైలీ పత్రిక ప్రచురించింది.

చైనా ఆంక్షలు - ప్రపంచ ప్రభావం
గత ఏప్రిల్ నెలలో చైనా ప్రభుత్వం అనేక రకాల రేర్ ఎర్త్ పదార్థాలు, వాటితో ముడిపడిన అయస్కాంతాల ఎగుమతులను నిలిపివేస్తూ నిర్ణయం తీసుకుంది. ఈ నిర్ణయం ప్రపంచవ్యాప్తంగా ఆటోమొబైల్ తయారీ సంస్థలు, ఏరోస్పేస్ కంపెనీలు, సెమీకండక్టర్ల తయారీదారులు, సైనిక కాంట్రాక్టర్ల సరఫరా వ్యవస్థలపై తీవ్ర ప్రభావం చూపుతోంది. ఈ రేర్ ఎర్త్ పదార్థాలు అనేక కీలకమైన ఎలక్ట్రానిక్, మాగ్నెటిక్ భాగాల తయారీలో అత్యంత అవసరం.

చైనా ఆంక్షల కారణంగా కొన్ని యూరోపియన్ ఆటో విడిభాగాల తయారీ ప్లాంట్లు కూడా ఇప్పటికే తమ ఉత్పత్తిని నిలిపివేశాయి. ప్రముఖ లగ్జరీ కార్ల తయారీ సంస్థ మెర్సిడెస్-బెంజ్ సైతం రేర్ ఎర్త్స్ కొరతను ఎదుర్కొనేందుకు ప్రత్యామ్నాయ మార్గాలను అన్వేషిస్తున్నట్లు సమాచారం. చైనా తీసుకున్న ఈ నిర్ణయం అంతర్జాతీయంగా అనేక పరిశ్రమలను సరఫరా సమస్యల్లోకి నెట్టింది.